“ជំងឺរលាកប្រអប់ខ្យល់រ៉ាំរ៉ៃ (Sinusitis)” អាចនាំឱ្យមានផលវិបាកធ្ងន់ធ្ងរបាន

ប្រសិនបើអ្នកមានអាការៈតឹងច្រមុះមិនជាសះស្បើយ សំបោរមានពណ៌បៃតងឬពណ៌លឿង ក្អកជាប់គ្នាជាច្រើនសប្ដាហ៍ ឈឺក្បាល ដកដង្ហើមមានក្លិនស្អុយ រោគសញ្ញាទាំងនេះអាចជាសញ្ញាប្រមាននៃជំងឺរលាកប្រអប់ខ្យល់ (Sinusitis) ដែលជាជំងឺដែលរកឃើញញឹកញាប់បំផុតក្នុងកុមារនិងមនុស្សធំ ប្រសិនបើមិនបានទទួលការព្យាបាលអាចបង្ករឪ្យទៅជាជំងឺរលាកប្រអប់ខ្យល់រ៉ាំរ៉ៃ (Sinusitis) ដែលអាចបង្ករផលវិបាកដ៏ធ្ងន់ធ្ងរបាន

លោកវេជ្ជបណ្ឌិត Bannawat Tantikun គ្រូពេទ្យឯកទេសខាងផ្នែកត្រចៀកច្រមុះ និងជំងឺអាលែហ្សី នៃមន្ទីរពេទ្យវេជ្ជថានី បានពោលថា ជំងឺរលាកប្រអប់ខ្យល់ (Sinusitis) គឺជាជំងឺដែលកើតមកពីការរលាក, ឆ្លងមេរោគនៃប្រអប់ខ្យល់ក្នុងច្រមុះ (Sinus) ដែលជាទូទៅប្រអប់ខ្យល់ (Sinus) មានរួមជាមួយគ្នាសរុប ៤គូរ ដូចជា បរិវេនថ្ងាស បរិវេនចន្លោះក្បាលនិងភ្នែក បរិវេនថ្ពាល់ក្បែរច្រមុះ និងបរិវេនលលាដ៍ក្បាល ដោយការរលាកអាចកើតឡើងបានគ្រប់ប្រអប់ខ្យល់។

ជំងឺរលាកប្រអប់ខ្យល់ (Sinusitis) មានរោគសញ្ញាស្រដៀងនឹងជំងឺផ្តាសាយទូទៅ ឬជំងឺ​អាឡែស៊ី ប៉ុន្តែ​វា​នឹង​មាន​រោគសញ្ញា​​ធ្ងន់ធ្ងរ និង​យូរជាងធម្មតា ឧទាហរណ៍ តឹង​ច្រមុះ សំបោរខាប់មានពណ៌បៃតងឬពណ៌លឿង ស្លេសធ្លាក់ទៅក្នុងក ជំរុញ​ឱ្យមានការ​ក្អក​ញឹកញាប់ ដកដង្ហើមមានក្លិនស្អុយ ឈឺក្បាល ឬ​ឈឺសៀតផ្ការ ឬឈឺបរិវេនជុំវិញច្រមុះឬចញ្ចើម និងថ្ងាស់ ក្នុងករណីខ្លះដែលមានរោគសញ្ញាធ្ងន់ធ្ងរ អាចមានគ្រុនក្តៅខ្លាំង ហើមភ្នែក រលាកជាដើម។

ជំងឺរលាកប្រអប់ខ្យល់ (Sinusitis) ត្រូវបានបែងចែកជា ៣ ប្រភេទដូចជា៖

1. ជំងឺរលាកប្រអប់ខ្យល់ស្រួចស្រាវ (Acute  Sinusitis) គឺបណ្តាលមកពីការឆ្លងមេរោគនិងបាក់តេរីដែលបណ្តាលឱ្យរលាក មានស្លេសច្រើនជាងមុន តឹងច្រមុះនិងមានរោគសញ្ញាមិនលើសពី ៤ សប្ដាហ៍
2. ជំងឺរលាកប្រអប់ខ្យល់ប្រភេទពាក់កណ្តាលស្រួចស្រាវ (Subacute) គឺជាជំងឺរលាកប្រអប់ខ្យល់ដែលមានមានរយៈពេលពី ៤ ទៅ ១២ សប្តាហ៍
3. ជំងឺរលាកប្រអប់ខ្យល់បែបរ៉ាំរ៉ៃ (chronic sinusitis) គឺជាការរលាករ៉ាំរ៉ៃដែលមិនបានបង្ករមកពីមូលហេតុនៃការឆ្លងមេរោគ ដោយមានអាការះរ៉ាំរ៉ៃលើសពី ១២សប្ដាហ៍ ដែលភាគច្រើនតែងរកឃើញក្នុងអ្នកជំងឹដែលមានជំងឺអាឡែស៊ី។

មូលហេតុនៃការកើតជំងឺរលាកប្រអប់ខ្យល់ (Sinusitis) គឺបណ្តាលមកពីកត្តាជាច្រើនដូចជា កើតឡើងបន្ទាប់ពីមានជំងឺផ្តាសាយ ដែលជាមូលហេតុដែលជួបញឹកញាប់បំផុត ជាពិសេសក្នុងករណីអ្នកជំងឺដែលមានជំងឺផ្តាសាយ​ហើយ​សម្រាក​មិន​បាន​គ្រប់គ្រាន់ ជំងឺអាឡែស៊ី ធ្វើ​ឱ្យ​ស្រទាប់​ខាងក្នុង​នៃ​ច្រមុះ និងប្រអប់ខ្យល់ហើម ម្តងហើយម្តងទៀតជាប់គ្នាក្នុងរយៈពេលយូរ ភាពខុសប្រក្រតីនៃប្រហោងច្រមុះ ដូចជា ភ្នាសច្រមុះវៀចឬឆ្អឹងនៅជញ្ជាំងចំហៀងនៃប្រអប់ខ្យល់មានខ្នាតធំខ្លាំងរហូតបង្ករឪ្យមានការស្ទះរន្ធប្រអប់ខ្យល់ និងជំងឺឬសដូងច្រមុះ ឬដុំសាច់ក្នុងប្រអប់ខ្យល់។

ផលវិបាកនៃជំងឺរលាកប្រអប់ខ្យល់ (Sinusitis)

• មាន​ឥទ្ធិពល​លើ​ភ្នែក ធ្វើ​ឱ្យ​ជាលិកា​ជុំវិញ​ភ្នែក​រលាក ដូចជា ​ហើម​ភ្នែក ឈឺភ្នែក គ្រលៀសភ្នែកហើយឈឺ មើលឃើញបែកចេញជាពីរ មើលមិនច្បាស់ជាដើម
• ផ្នែកខួរក្បាល ដោយមានអាការៈឈឺក្បាល មានអាការៈក្អួតចង្អោរ​ មើលឃើញបែកចេញជាពីរ មើលមិនច្បាស់ ខ្សោយសាច់ដុំ រួមជាមួយនឹងគ្រុនក្តៅខ្លាំង
• មានផលប៉ះពាល់ទៅលើជាលិកាប្រព័ន្ធដង្ហើមផ្នែកខាងលើនិងក្រោម បង្ករការរលាកក្នុងត្រចៀកផ្នែកកណ្តាលធ្វើឪ្យហឹងត្រចៀក ភ្នាសក្នុងបំពង់ករលាក រលាកបំពង់សំឡេងរ៉ាំរ៉ៃ

ការធ្វើរោគវិនិច្ឆ័យនៃជំងឺរលាកប្រអប់ខ្យល់ (Sinusitis) វេជ្ជបណ្ឌិតនឹងចាប់ផ្តើមដោយការសាកសួរប្រវត្តិអ្នកជំងឺ ត្រួតពិនិត្យរាងកាយ និងធ្វើការឆ្លុះដាក់កាមេរ៉ាចូលទៅក្នុងប្រអប់ខ្យល់ ក្នុងករណីជាជំងឺរលាកប្រអប់ខ្យល់រ៉ាំរ៉ៃដែលចាំបាច់ត្រូវធ្វើការវះកាត់ ឬអ្នកជំងឺដែលមានជំងឺផ្សេងរួមបញ្ចូល អាចចាំបាច់ត្រូវធ្វើការត្រួតវិនិច្ឆ័យបន្ថែមដោយការធ្វើ CT-Scan ឬ Xray Computer ដើម្បីជួយបញ្ជាក់ពីរោគវិនិច្ឆ័យ ឬប្រាប់ពីភាពធ្ងន់ធ្ងរនៃជំងឺ។

ការព្យាបាលជំងឺរលាកប្រអប់ខ្យល់ស្រួចស្រាវ (Acute  Sinusitis) ភាគច្រើនត្រូវបានព្យាបាលដោយថ្នាំអង់ទីប៊ីយោទិច ថ្នាំកាត់បន្ថយការហើមនៃភ្នាសច្រមុះ ដោយវេជ្ជបណ្ឌិតនឹងចេញវេជ្ជបញ្ជាឱ្យប្រើថ្នាំអង់ទីប៊ីយោទិចក្នុងរយៈពេលមួយ អាស្រ័យលើភាពធ្ងន់ធ្ងរនៃជំងឺ និងប្រភេទមេរោគ។ ចំណែកឯជំងឺរលាកប្រអប់ខ្យល់បែបរ៉ាំរ៉ៃ (chronic sinusitis) វេជ្ជបណ្ឌិតអាចពិចារណាការព្យាបាលដោយប្រើ ស្តេរ៉ូអ៊ីតបាញ់ក្នុងច្រមុះ ឬប្រើទឹកសេរ៉ូមប្រៃលាងច្រមុះ ប៉ុន្តែបើព្យាបាលដោយវិធីនេះហើយរោគសញ្ញានៅមិនប្រសើរឡើងទេ នោះអាចចាំបាច់ត្រូវព្យាបាលដោយការវះកាត់ ដោយក្នុងបច្ចុប្បន្នការវះកាត់ប្រអប់ខ្យល់ គេនិយមធ្វើការវះកាត់តាមច្រមុះដោយប្រើ endoscope ដែលអាចឱ្យគ្រូពេទ្យមើលឃើញកន្លែងវះកាត់បានយ៉ាងច្បាស់ អាចកាត់ជាលិកាដែលរលាកចេញទាំងស្រុងបាន។ ដោយសារការវះកាត់ត្រូវបានធ្វើតាមរយះច្រមុះទើបធ្វើឪ្យមិនមានស្លាកស្នាមនៅលើស្បែក និងជាវិធីព្យាបាលដែលមានសុវត្ថិភាពបំផុត កត្តា​នេះ​ធ្វើ​ឲ្យ​អ្នក​ជំងឺ​ហូរ​ឈាម​តិច ការឈឺចាប់ពីមុខរបួសតិច អាចដកដង្ហើមតាមច្រមុះបានស្រួល និងឆាប់ជាសះស្បើយ។

ដូច្នេះការថែទាំខ្លួនឯងនៅពេលមានជំងឺរលាកប្រអប់ខ្យល់គឺ ចាប់ផ្តើមពីការសម្រាកឪ្យបានគ្រប់គ្រាន់ ធ្វើលំហាត់ប្រាណឪ្យបានទៀងទាត់ បញ្ឈប់ការជក់បារី បញ្ឈប់ការពិសារគ្រឿងស្រវឹង ពិសារទឹកឪ្យបាន ៧-៨កែវក្នុងមួយថ្ងៃ ជៀសវាងធូលីដី និងកន្លែងដែលមានការប្រែប្រួលសីតុណ្ហភាពភ្លាមៗ ដូចជាកំពុងក្តៅខ្លាំងទៅត្រជាក់ខ្លាំងភ្លាមៗ។ ប្រសិនបើរោគសញ្ញាកាន់តែធ្ងន់ធ្ងរ អ្នកគួរតែទៅជួបគ្រូពេទ្យឯកទេសភ្លាមៗ ដើម្បីទទួលថ្នាំ និងតាមដានការព្យាបាលឪ្យបានទៀងទាត់។

សម្រាប់ព័ត៌មានបន្ថែម ឬធ្វើការណាត់,​​ សូមទាក់ទងមកកាន់

មជ្ឈមណ្ឌលត្រចៀក ច្រមុះ បំពង់ក,
មន្ទីរពេទ្យវេជ្ជថានីសេវាកម្មទូរស័ព្ទ ២៤ម៉ោង: (+66)89-201-900