ស្វែងរកគ្រូពេទ្យ មគ្គុទេស ធ្វើការណាត់ជួប និយាយជាមួយគ្រូពេទ្យ

អត្ថបទសុខភាព

“មហារីកសាច់ដុំបេះដូង” គឺជាគ្រោះថ្នាក់ស្ងាត់ចំពោះបេះដូងដែលអាចកើតឡើងដោយមិនដឹងខ្លួន

ជំងឺមហារីកគឺជាការគំរាមកំហែងដល់សុខភាពដែលមនុស្សជាច្រើនដឹងអំពីវា ប៉ុន្តែសម្រាប់ជំងឺមហារីកសាច់ដុំបេះដូង វាជាជំងឺកម្រមួយ ហើយមានព័ត៌មានតិចតួចបើធៀបនឹងប្រភេទមហារីកផ្សេងទៀត មនុស្សជាច្រើនប្រហែលជាមិនរំពឹងថានឹងកើតមហារីកក្នុងតំបន់នេះឡើយ ប៉ុន្តែជំងឺនេះអាចប៉ះពាល់ដល់មុខងារបេះដូងយ៉ាងធ្ងន់ធ្ងរ ប្រសិនបើមិនបានធ្វើរោគវិនិច្ឆ័យ និងព្យាបាលទាន់ពេលវេលា

វេជ្ជបណ្ឌិត APICHART JANTARAT វេជ្ជបណ្ឌិតឯកទេសខាងជំងឺមហារីក នៃមន្ទីរពេទ្យវេជ្ជថានី បានពន្យល់ថា ជំងឺមហារីកបេះដូង (Primary Malignant Cardiac Tumors) គឺជាជំងឺកម្រមួយ ដោយវាអាចកើតឡើងនៅតំបន់សាច់ដុំបេះដូង ឬសន្ទះបេះដូង តាមទិន្នន័យប្រវត្តិសាស្ត្រ ត្រូវបានគេរកឃើញថា អត្រាប្រេវ៉ាឡង់នៃជំងឺមហារីកបេះដូងមានពី 0.001% ទៅ 0.28% ដោយភាគច្រើនវាត្រូវបានរកឃើញថាជាមហារីកជាលិកា ឬហៅម្យ៉ាងទៀតថា sarcoma មូលហេតុនៃជំងឺនេះនៅមិនទាន់ដឹងច្បាស់នៅឡើយទេ

រោគសញ្ញានៃជំងឺមហារីកបេះដូង ជាធម្មតាវាតែងបណ្តាលមកពីការស្ទះនៅក្នុងលំហូរឈាមក្នុងបេះដូង ការរីករាលដាលនៃជំងឺមហារីកទៅសរីរាង្គផ្សេងទៀត រោគសញ្ញាអាចកើតឡើងដូចជា៖

ដង្ហក់ ហត់ ពិបាកដកដង្ហើម
ណែនទ្រូង គេងរាបមិនបាន
ចង្វាក់បេះដូងលោទខុសប្រក្រតី (ដូចជាបេះដូងលោតញាប់ ឬយឺត)
ភាពទន់ខ្សោយនៃដៃនិងជើង (ដោយសារជំងឺដាច់សរសៃឈាមខួរក្បាល)

សម្រាប់ការធ្វើរោគវិនិច្ឆ័យនៃជំងឺមហារីកសាច់ដុំបេះដូង អាចធ្វើបានដោយការសាកសួរប្រវត្តិ និងការធ្វើតេស្ដសំខាន់ៗដូចជា៖ ការពិនិត្យអេកូបេះដូង (Echocardiogram) រួមទាំងការពិនិត្យដោយប្រើបច្ចេកវិជ្ជាទំនើបដូចជាការថតរូបភាពបេះដូងដោយកាំរស្មីកុំព្យូទ័រ (CT Scan), MRI, ការពិនិត្យនិងថតរូបភាពសរសៃឈាមក្រហមដោយការចាក់ពណ៌ (Cardiac angiography) និងការច្រិបដុំសាច់សម្រាប់ការពិនិត្យរោគសាស្ត្រ

ការព្យាបាលដែលសំខាន់គឺការវះកាត់ ដោយជំហាននិងវិធីសាស្រ្តនឹងអាស្រ័យលើទីតាំងនៃជំងឺមហារីកបេះដូង លើសពីនេះទៀត ការព្យាបាលផ្សេងទៀតដូចជា ការព្យាបាលដោយប្រើគីមី និងការព្យាបាលវិទ្យុសកម្មនឹងអាស្រ័យលើដំណាក់កាលនៃជំងឺ និងប្រភេទមហារីក

យើងឃើញថា មហារីកបេះដូងជាជំងឺកម្រដែលមានផលប៉ះពាល់យ៉ាងធ្ងន់ធ្ងរដល់ដំណើរការរបស់បេះដូង ការពិនិត្យសុខភាពឪ្យបានទៀងទាត់ ហើយការដឹងពីភាពមិនប្រក្រតីក្នុងខ្លួនគឺជាការចាំបាច់។ ទាំងនេះនឹងជួយកាត់បន្ថយភាពធ្ងន់ធ្ងរនៃជំងឺបាន